Weihnachtsgedicht: STOP AGGLOlac wünscht frohe Festtage und einen guten Rutsch

​

Ds AGGLOlac Wiehnachtsgedicht

Jetz isch scho wieder es Jahr vergange
De Verantwortleche isch Angst und Bange
Bagger ufgfahre si no keni
Wiu zueglost hei si z'weni

AGGLOlac sigi es Meisterwärk, het me gmeint
I dr Bevölkerig sehr beliebt, wie es scheint
Gmerkt het me när ganz schockiert
Dass z Volk das Projekt nid goutiert

Lang het me vor luter Selbstgefälligkeit
G'redet vonere Alternativlosigkeit
Beton und Hochhüser bis a See 
Drbi het me früe scho gseh

Das isch e Schnapsidee!

Vieli Bilder, ganz sympathisch
Ergebe z Trugbild fo viel botanisch
D Vision vo chli Venedig
Isch abr scho lang erledigt

Hie gits e Konflikt fo Interässe
Die viele Fehltritt si es gfundnigs Frässe
D'Lüt werde die Verantwortleche dran mässe
Ob si ihri Verspräche nid hei vergässe

Versproche het me zersch e ExpoPark
D Zuestimmig drfür wär ganz stark
Die Plän si gwiche hochä Türm
Und gschtartet isch das Gschtürm
​
Viel Beton und e Planigs-Fehlfunktion
Präge z Bild vor AGGLOlac-Religion
D Rendite vom Investor steit im Zentrum
Uf Kritik reagiert me taubstumm

Für Lüt us dr ganze Region
Het üses Seeufer e anderi Funktion
Sport, Kultur und Naherholig isch sehr wichtig
G'haglet fiu Kritik hets drum so richtig

Füre Investor zählt vor auem d'Rendite
Hie zeigt er sech fo sinere Schattesite
Aalige us dr Bevölkerig si nur müesam
Die zeigt sech abr nümm so zahm

Ou dr Wiehnachtsmaa
Cha das Vorgehen nid verstah
Ohni z zögere git's e Ruete
Still und heimlech tuet er flueche

Wieso beliebti Institutione vertribe
We si o eifach chönnte blibe
Wieso Beton wohin das Auge reicht
We meh Augemass hätti greicht

E Sturm vo Entrüstig prasslet uf se i 
Reine Wii ischänke, das müesse si 
Aues andere führt zum ne Volksufstand
​Anstatt zum ne Vorgehe, Hand in Hand

Dene Stadtobere fehlts a Verstand
Formiert het sech starche Widerstand
Z'lang het me Kritik untere Teppich kehrt
Drum het sech d Bevölkerig jetz g'wehrt

Me redet vonere unheilige Allianz
Aber die Ussag het ke Substanz
Isch STOP AGGLOlac doch e Verein
Wo hunderti Bürger si deheim

Politiker vo links bis rechts kämpfe
Um d'Uswüchs fo AGGLOlac z'dämpfe
Üses Seeufer lö mr se nid lo verschandle
Mir lö üs nid länger so lo behandle

Befürworter hei lang nüt glehrt
D Bevölkerig het dr Spiess umkehrt
D Nidouer Bevölkerig het im Herbst
Bi de Wahle gredet klare Text 

D Befürworter e schallendi Ohrfige hei brcho
Vieli vo ihne si jetz nümme do
Z gliche Schiksal wird AGGLOlac erlide
We me bi de aktuelle Plän wird blibe

Wichtige Aalige müesse ufgnoh werde
Süsch lige d Plän bald unger dr Erde
Häre lose, e guete Punkt zum Start
Wäre d'Mitwürkige, die lige bi dr Stadt

Üse Verein het die scho zämegfasst
E Forderigskatalog hei mir verfasst
Die Pünkt mues me jetz realisiere
Vertreter us 9 Parteie tüe se adressiere

We me d Kritik witerhin tuet ignoriere
D Bevölkerig wird AGGLOlac usradiere
​De Projektverantwortleche sei geraten
Tüet die letschti Chance nid verbraten

D Geduld vor Bevölkerig geit langsam z'Änd
Die Gschicht nimmt für euch e abrupti Wänd
AGGLOlac blibt denn nur e Legänd
Geprägt fo luter dummer Missständ

Bi vielne Lüt herrscht Frust und Trotz
Die gwinnet dr nid mit no meh Betonklotz
Nämet nech drum e guete Neujahrsvorsatz
Süsch isch die Üebig gsi für d Chatz

Es einzigartigs Seequartier bout me nid allei
Euch isch gseit: Hie si mir dehei!
We hie öbis söu entstah
Müesse mr e Vertrauensbasis ha

Mir tüe euch z Agebot für e Diskussion unterbreite
Damit d Bevölkerig das Projekt cha begleite
STOP AGGLOlac wird nech die letzti Chance gewähre
We me ä Veränderig am Projekt wird erkläre

Zum Schluss es chlises Resumé 
Änderet öii AGGLOlac-Idee
Süsch findet dir se eines matinée
Ufem Grund vom Bielersee

​